ԱՐԱՄ ՍԱԹՅԱՆ

• Կոմպոզիտոր

ՀՀ արվեստի վաստակավոր գործիչ, Հայաստանի Կոմպոզիտորների միության նախագահ։

1970 թ-ից ԽՍՀՄ կոմպոզիտորների միության անդամ է։

1973-80 թթ աշխատել է ՀԽՍՀ հեռուստառադիոպետկոմում՝ որպես երաժշտական խմբագիր, 1980-86 թթ՝ Երևանի Բաբաջանյանի անվան երաժշտական ուսումնարանում՝ որպես երաժշտության տեսության բաժնի վարիչ։

1990-94 թթ եղել է Երևանի Կամերային նվագախմբի գեղարվեստական ղեկավարը, 1994-97 թթ՝ Հայաստանի հեռուստառադիո պետական վարչության երաժշտական ծրագրերի և խմբերի տնօրենն ու գեղարվեստական ղեկավարը։

Երևանի կոնսերվատորիայի պրոֆեսոր է։ Արժանացել է բազմաթիվ մրցանակների տարբեր հանրապետական մրցույթներում։ Գրել է «Լիլիթ», «Փոքրիկ Ցախեսը», «Մանեկեն» փոփ օպերաները, «Մենք դաշնամուր ենք նվագում» բալետը, 3 սիմֆոնիա, մի շարք կոնցերտներ, բազմաթիվ սիմֆոնիկ և կամերային ստեղծագործություններ, ավելի քան 300 երգեր և ռոմանսներ, երաժշտություններ կինոյի և թատրոնի համար։

Թողարկել է բազմաթիվ ձայնապնակներ, ձայներիզներ Հայաստանում, Ռուսաստանում, ԱՄՆ-ում, Ֆրանսիայում, Արգենտինայում, ունի ֆոնդային ձայնագրություններ։